माई के वियोग

टुकर – टुकर देखत बाड़ऽ

लाशावा गिनत बाड़ऽ

टभकेला माई के ममतावा नीतिश बाबू ।

बुझेलऽ ना दु:खवा – वियोगवा नीतिश बाबू ।।

कवने कसूरवा करेजावा के ख़ून भइल

माई के आँचरावा – गोदवा बिहुन भइल

कालवा के नागवा

ई चमकी बोखारवा

निगऽलता रोज़े – रोज़े कोखवा नीतिश बाबू ।

बुझेलऽ ना दु:खवा – वियोगवा नीतिश बाबू ।।

कइसन आफदरा में परल बा पारानवा हो

छट – पट करे दुध मुँहवा ललनावा हो

अँखिओ ना खोलत बा

नाहि तनिको डोलत बा

अईंठेला यमवा जियरावा नीतिश बाबू ।

बुझेलऽ ना दु:खवा वियोगवा नीतिश बाबू ।।

बिलखे शहरिया आ गऊँआ – नगरिया हो

चीखवा – पुकार सुनीं जाईं जवने रहिया हो

ढ़रकऽत लोरवा बा

नाहि जेकर छोरवा बा

हॉय ! हहरे अभागीन के हियावा नीतिश बाबू ।

बुझेलऽ ना दु:खवा वियोगवा नीतिश बाबू ।।

बिहार में बहार बा सवाल ढ़ेरो खाड़ बा

अजधल में पड़ल जिनिगिया लाचार बा

हॉय ! कइसे चूमी मुँहवा

उड़ गइलें मोर सुगनावा

कलपेला पल – पल हो रोआँवा नीतिश बाबू ।

बुझेलऽ ना दु:खवा वियोगवा नीतिश बाबू ।।

कर जोऽड़ी विनती अरजिया करत बानी

धंसल विपतिया के दलदल में हम बनी

कवनोऽ जतन करऽ

अबहूँऽ से पीर हरऽ

डहके धरतिया आकाशवा नीतिश बाबू ।

बुझेलऽ ना दु:खवा वियोगवा नीतिश बाबू ।।

माई के गोदिया बिहुन हो गइल । उनकर करेजावा के ख़ून हो गइल –

मुज़फ़्फ़रपुर में चमकी बोखार के प्रकोप जारी बा । डाक्टर लोगन के शोध जारी बा । करीब 150 लड़िकन के निगल चुकल बा । ई काल के नाग आपन फ़न खोल चुकल बा । पसरत बा धीरे – धीरे अब पूरे बिहार में । छोट लड़िकन के चपेटत बा दिमागी बोखार में । मचल हहाकार बा गऊँआ – शहरिया में । चीखवा – पुकार सुनाता नगर के गलिया में । देश के भविष्य मौत के नींद सुत रहल बा । सिस्टम बुत बनल ना नींद से ना उठ रहल बा ।

पुत्र के वियोग में –

पुत्र के वियोग में डूबल पूरा बिहार । एह दु:ख के बदरा से सरकारो गइल हार । एह दलदल से निकले के उपाय नईखे सूझत । इंसानियत के पीर काहे भगवान भी नइखन बूझत ? निष्कर्ष एकर का होई कइसे बताईं ? कइसे में लोकवा के पीड़ा पर मरहम छपाई ? संकट बा भारी कइसन महामारी बा पसरल । पुत के वियोग में करेजावा बा सिकुड़ल ।

अब त केतना घर के आँगन सुन हो गइल । लेकिन, लागता जइसे नेताजी लोगन के खूनवा त नून हो गइल । नीतिश सरकार के धेयान केने बा ? उनकर संवेदना के खिलल चान केने बा ?

राउर प्यार लिखे खातिर उत्साहित करेला । कृपया करके आपन प्रतिक्रिया जरूर दिहीं ।

ओमप्रकाश अमृतांशु