भूखल देहिया डहके सड़किया पे

भूखल देहिया डहके सड़किया पे ,

तड़पेला आदमी के जतिया । हो रामजी ।।

1

जेठ दुपहरिया के दवंके बेयरिया हो

लूकवा चलेला जइसे बरिसेला अगिया हो

छन – छन जरे जिउवा , अदहन बा पनिया से ,

तड़पेला आदमी के जतिया । हो रामजी ।।

2

अँखुआइल सपना गँउवा रे घर के

निकलल भीड़वा शहरिया के छोड़िके

सिर पे मोटरिया बा , पग – पग विपतिया

तड़पेला आदमी के जतिया । हो रामजी ।।

3

गोड़वा के जूतावा – चप्पलवा चिथड़ी भइले

डेगवा बढ़े ना अब , फोड़वा फफकी गइले

खोभेला करेजावा में बरछी इंकड़िया हो

तड़पेला आदमी के जतिया । हो रामजी ।।

4

दुधमुँहा बाचावा गोदिया में छछने

फेफड़ी परल बा पारानवा में खखने

छटपट करे छट – पट पानी बिन मछरिया

तड़पेला आदमी के जतिया । हो रामजी ।।

5

आइल रे कोरोनावा , लेआइल कइसन दिनवा

लॉकडाउन भइल प्रवासी के जानवा

रोटी – रोजगारवा पे चलले कुदरिया

तड़पेला आदमी के जतिया । हो रामजी ।।

6

मजदूर लोग काहे भइल मजबूर बा

सुनी ! हे सरकार कवन हमरो क़सूर बा

का लिलरा पे लिखल ना मिटिहें ग़रीबीया ?

तड़पेला आदमी के जतिया । हो रामजी ।।

भूखल देहिया डहके सड़किया पे ,

तड़पेला आदमी के जतिया । हो रामजी ।।

भूखल देहिया डहके सड़किया पे , देखिके जागल हमरो कलमिया-

लॉकडाउन के समय प्रवासी मज़दूरन के जवन गींजन भइल , उ देख के हमसे रहल ना गइल । रउरो दिल में कहीं ना कहीं चोट लागल होई । हम रचनाकार – कलाकारन के आत्मा भावुक होखेला । कलम जाग जाला । ब्रश दिल के कुरेदे लागेला । इंसान के झुण्ड भूखल देह सड़क पर चलेके काहे मजबूर भइल । आपन घरे – दुआरे जाए के सभे के मानवीय भावना होखेला

महामारी कोरोना के चलते लॉकडाउन के साथे – साथे प्रवासी मजदूरन के जीनिगी भी लॉक हो गइल । रोज़ कमा के खाए वाला आदमी के रोजगार रोटी पर आरी – कुल्हाड़ी चल गइल । केहू के मकान मालिक खदेरलस । केहू के कमाईल पईसा मालिक लोग देवे से मना कर दिहलस । एह प्रवासी मज़दूर लोगन पर चारों ओर से बिजली गिरल । ना खाए के ठिक । ना रहे के ठिकाना । घरे जाए के साधन बस आ ट्रेन सब कुछ बंद । एगो अंतिम उपाय यही देखाई देलस । जवन आपना हाथ में रहे लोग उहे कइलस । हजार – हजार किलोमीटर पैदल चल के मजदूर लोग आपन घर – दुआर जाए लागल ।

बार – बार एगो सवाल उठता मन में कि लिलार पर जवन ग़रीबी के मुहर लागल बा कहिया ले मिटी ?

राउर प्यार हमके लिखे खातिर उत्साहित करेला । कृपया करके आपन प्रतिक्रिया जरूर दिहीं ।

ओमप्रकाश अमृतांशु

कृपया हमसे Facebook और Twitter पर जुड़ी। धन्यवाद 🙏