प्रेम के रंग में रंगाईल ना केहू होली आइल

प्रेम के रंग में रंगाईल ना केहू 
होली आ गइल का हो ?

फागुन त आईल बा मालूम बा हमरो
केहू फगुआ के तान सुना गईल का हो ?

कोइलिया के बोली मधिम बा बगिया में
कवनो शिकारिया जाल बिछा गइल का हो ?

बसंती बेयार में अजबे से गंध बा काहे दो
केहू हवा में धुआँ उड़ा गइल का हो ?

 आइल होली आइल रे

ढोलक -झाल ना बिरहा बा जोगीरा
सारा रारा रारा होंठवा से फेंका गइल का हो ?

पिचकारी के रंग पन्छुछुर बा काहे दो
रिश्तो में मिलावटी पन आ गइल का हो ?

आज दुबक के काहे बइठल बाड़ घरवा में
छिंटाकसी के कीचड़ फेंका गइल का हो ?

काहे नईखे मिलत संविधान में भोजपुरी के दरजा….

अइसन पोताईल बा हरियरका-ब्लूका रंगवा
लगता मुँहवे पर गोबरा पाथा गइल का हो ?

मरऽ बेरोजगारी में रात -दिन भक्ति करऽ तु
पकौड़ा के दोकान छना गइल का हो ?

सफेद कुरता – पायजामा के बोल बाला बा
सफेद झूठो खरीदा गइल का हो ?

सुनले रहनी कि उड़ेला होली में रंग-अबीर
कवनो फोकटे में धुर फांका  गइल का हो ?

भेद-भाव, ऊँचा-नीचा, के भाव मिटी कहिया ले
लागता आऊरी ऊपरा आ गइल का हो ?

देवरू कहाये के सवखे रह गइल बुढ़ऊ के
लार चुआ के उलटे चटा गइल का हो ?

अश्लील गीतन के चलन बा फगुआ में खुबे
संस्कृति धरण पे टंगा गइल का हो ?  

जोड़ -जोड़ के पईसा जवन रखले रह जन-धन में
ससुरा नीरव मोदिया उड़ा ले गइल का हो ?

भष्टाचार के दलदल में फंसलऽ देश हमार
जहान में नम्बर वन गिनाई का हो ?

सीमावा पा दन-दन गोली चलवता जवानवा
गवनवा करावे ना आई का हो ?

आज वीडियो कांफ्रेंस से होली के सनेस दीहें नेताजी
अब ऑनलाइन होली  मनावल जाई का हो ?

लकड़ी-गोईठा के बनावल सम्हत त ज़र गइल
पाप के होलिका ना ज़री का हो ?

कृष्ण के होली ह राम के होरी
नफ़रत के गोली चलावल ज़रूरी बा का हो ?

हम त लिखे बइठल रहनी होली पर व्यंग्य गीत
आई हो दादा गजल लिखा गइल का हो ?

ओमप्रकाश अमृतांशु