'वैर के अंत' भोजपुरी में नाट्य प्रस्तुति

‘वैर के अंत’ भोजपुरी में नाट्य प्रस्तुति

रंगश्री नाट्य संस्था दिल्ली के ओर से प्रेमचंद के जन्मदिवस 31 जुलाई के नया अंदाज में मनावल गइल । महान कथाकार के कहानी ‘वैर के अंत’ के भोजपुरी में नाट्य प्रस्तुति करके ईयाद कइल गइल । गोल मार्केट दिल्ली के मुक्तधारा ऑडिटोरियम उत्सव के गवाह बनल । कबो – कबो ताली के आवाज से बोल उठे आडिटोरियम । वाह ! वाह ! त कबो चुप्पी साध के नाटक के भाव मे अपना आप के डूबा लेवे । लोकजीवन के असली जीवंत रंग एह नाटक में देखे के मिलल। सच्चाई के जमीन पर उकेरल भाव के पीड़ा आपन – आपन सा लागल । सहोदर भाई के क्रिया – कर्म के साथे वैर के बीजारोपण होखत बा । जे एह बीज के रोपलस ओकर अंत त जरूरिये रहे । साथ में कबो – कबो मधुर संगीत के फुहार दिल के छुए में आगे रहल ।

दर्शक दीर्घा पहिले से खचाखच भरल बा । तब हम प्रक्षागृह में प्रवेश कइलीं । खड़ा हो करके आपन बइठे के जगह खोजे लगलीं । पत्रकार दीर्घा में एगो कुर्सी खाली रहे । लेकिन , हम पत्रकार त रहनी ना । फिर पीछे के ओर आपन नजर दौडवनी । एगो कुर्सी खाली मिलल । झटके से वोह कुर्सी पर आपन हक जतावत बइठ गइलीं । ‘वैर’ के कइसे अंत होखत बा , देखे खातिर मंच पर आपन आँख टिकवलीं ।

‘वैर के अंत’ के नाट्य कलाकार –

तीन भाई में से एक भाई के मृत्यु हो जाता । शाहोदर भाई के लाश परल बा । क्रिया – कर्म खातिर उनकर हिस्सा के खेत रेहान रखाइल । भोजपुरी में समझी चाहे हिंदी में, कहल जाव त एहिजे से ‘वैर’ के बीज रोपाइल । लालची आ क्रूर छोट भाई विशेश्वर राय के मन में वैर के पौधा उगल । अब उ सउँसे जमीन हड़पे के खातिर उठल । विशेश्वर राय के भूमिका में उपेंद्र सिंह चौधरी के बेजोड़ अभिनय क्षमता देखे के मिलल । मन में वैर के पौधा के कइसे पालल – पोसल जाला, चित्र उजागर कइलें । साथ में घाव के गहरा दर्द के भाव अभिनय के द्वारा प्रस्तुत कइलें । वीणा वादिनी पग – पग पर साथ निभावली उनकर मेहरारू बनके । एकदम सटीक आ गाँव में गोतिया के देखके जर – बुतावे वाला अभिनय । ताली बटोरेवाली नाट्य भूमिका ।

‘वैर का अंत’ भोजपुरी नाट्य प्रस्तुति — **फोटो- ओमप्रकाश अमृतांशु / वैर का अंत का एक दृश्य**

दोसरा ओर गरीब – किसान माझिल भाई रामेश्वर राय के भूमिका में अखिलेश पांडेय रहलें । आपन दमदार अभिनय के दम मंच पर मंचित कइलें । रामेश्वर राय के मेहनती बेटा जागेश्वर जेकरा से नाटक आगे बढ़त बा । सौमित्र वर्मा एह किरदार के जीवंत बनावत दिखलें । उनकर अभिनय के पराकाष्ठा सभ दर्शक लोगन के अचंभित कइलस ।

भोजपुरी नाटक प्रस्तुति के बढ़त डेग –

हिन्दी के तरह भोजपुरी नाटक के डेग कबहिं रुकल ना । कबहिं थाकल ना । भोजपुरी के समर्पित रंगश्री हमेशा आ अनवरत प्रयासरत रहल । भोजपुरी के झंडा लहरावे के संघर्ष करत सुंदर भविष्य के ओर आगे बढ़ रहल बा । एही से ‘वैर के अंत’ के भोजपुरी नाट्य रूपांतरण भइल । आ महेंद्र प्रसाद सिंह के निर्देशन में नाट्य मंचन भइल ।

नाटक के दृश्य में मृत सीदेश्वर राय के इकलौती बेटी के भूमिका में किरण अरोड़ा आ मिना राय के अभिनय उड़ान पसंद आइल । नम्रता सिंह जागेश्वर के पत्नी बन आपन अभिनय के पताका फहरावली । एकदम ठेंठ गाँव देहात गरीब के मेहरारू के भूमिका में । जबरदस्त जमीन से जुड़ल अभिनय से दर्शक के मन मष्तिष्क पर छा गइली ।

पहिला बेर नंदिनी मंच पर नजर अइली । गरीब , लाचार आ ईमानदार रामेश्वर राय के मेहरारू बनके रंगमंच के दुनिया में डेग बढ़वली । एकरा साथे गवाह रुस्तम आ योगेंद्र के सराहना मिलल । महाजन के रोल में रामसुभग तिवारी भी आपन प्रस्तुति दिहलें । मुन्ना कुमार महंगू बनके रंग जमवलें । एकरा अलावे अन्य कलाकार लोगन के भी अभिनय योगदान सराहनीय आ शानदार रहल । बाल कलाकार के सहभागिता भी खुब शानदार रहल ।

सूत्रधार के भूमिका लावकान्त सिंह के कंधा पर रहे । जेकरा के आपन समझदारी आ जिम्मेदारी समझ के निभवलें । संगीत प्रस्तुति राजा के रहे ।

नाटक ‘वैर के अंत’ । निर्देशक – महेन्द्र प्रसाद सिंह

अब निष्कर्ष कि ‘वैर के अंत’ सफल आ सराहनीय प्रस्तुति रहल । रंगश्री संस्था के बहुत – बहुत बधाई दिहल जा सकता । नीचे कमेंट बॉक्स में ररुओ शुभकामना आ बधाई दे सकीलें । धन्यवाद ।

आपका प्यार हीं हमें लिखने के लिए उत्साहित करता है।कृपया अपनी प्रतिक्रिया अवश्य दें ।

हमसे जुड़ी – https://facebook.com/cartoondhun

https://twitter.com/cartoondhun